В сем году 1843-м месяца сентября с 10-го на 11 -е с пятницы по полудни в 11 -м часу на субботу в ночи бысть знамение в селении Дегутех на русском кладбище на старой могиле покойного Давыда Алексеича (брата Татияны Алексеевны Танеевой, бабы Тита Васильича) горяше, аки свеща. И сицевое знамение узреся насмельниками онаго селения Дегуть. И первый видец поведа другому, а оный третьему, от сих же мнози // уведеша и стекахуся видети онаго чудесе. Собравше же ся на горнее место, зряху к кладбищу и видяху, аки свещу горящу, удивляющеся и тако позорующе. Нецыи из позаратаев посоветовавшеся идоша на кладбище, хотяще истее видети зримое. Приидоша же на место и видеша свещу горящу, быша во ужасе. И некто из них чином десяткник восхоте взяти оную свещу горящую и не возможе: егда бо хотяще к ней прикоснутися, тогда аки бы некто отторже его. Он же во ужасе быв отьиде оттуду, поведая всем приключьшееся ему диво. Посем и прочий приидоша к оной могиле и тии видавше свещу горящу, но прикоснутися к ней не смеяху. //

 

В то время поведаша настоятелю Титу Васильичу о сем знамении, он же слышав сие чудо, возбуди всех домомчадцов своих, поведая им слышанное. Они же скоро воставше, а настоятель в то время уготовав кадильницу, взем ю и со всеми своими иде борзо для кладбища. Пришедше же на место, видеша явльшуюся свещу горящу и вси со удивлением на ню смотряще. Тогда настоятель возложь на горящее углие в кадильницу фимиаму довольно и сотворь пред честным и животворящим крестом ту стоящим обычныя поклоны и со страхом и любовию (страхом убо греха ради, любовию же спасения ради) покадив оный животворящий крест Христов. //

 

Потом идеже свеща горяща, окрест оныя могилы хождаше и кадяше, молитву Исусову творяше, а свеща горяше, не угасаше. Таже наченше по усопших литию, и певше ю, взирающе на свещу. По окончании литии настоятелева анепсея, именем Ксенья, хотяше оную чудную свещу взяти, но настоятель не соизволи ее хотению, воспрети начинанию, и тако оставиша чудную свещу горети. Тогда настоятель и вси сущий с ним людие идоша кииждодо своего жилища, вспять изирающеся, чудному видению удивляющеся. Егда же настоятель прииде в свою келию и приникну в оконце к кладбищу, виде оную свещу горящу, жадая зрения смотряше и видимое // к концу приближашеся, свеща бо оная нача блеск испущати и угасати, напоследи блиснувши и угасну, и сице скончася видимое.

 

Во утрии же день нецыи идоша на кладбище ко оной могиле, идеже виденная свеща горяше, но тамо ничего призрачнаго не бяше, с тем к домови возвращшеся, прошедшему видению чудящеся.