Неизмерьна небесная высота, ни испытана преисподняя глубина, ниже сведомо Божия смотрения таиньство, велика бо и неизреченьна милость Его на роде человечьстемь, еюже помиловани быхом. Того ради дължьни есмы, братие, хвалити и пети и прославляти Господа Бога и Спаса нашего Исуса Христа, исповедающе великая Его чюдеса, еликоже их створи - неисповедима бо суть ни ангелом али нъ человеком.

Ныня же о раслабленемь побеседуим, егоже днесь Сам Бог въспомянул и призрел и помиловал, егоже и врачеве небрегома створиша, егоже презряху въметающеи в купель, егда бо възмутяшеться вода, вьси о богатых пекущеся сдравии, сего отреяху, егоже ныня Христос благий человеколюбець словомь ицели, врачь бо есть душам нашим и телом, и слово Его деломь бысть.

Глаголеть бо евангелист: Възиде Исус в Иеросалим в преполовление жидовьска праздьника, егдаже множьство народа от всех град по обычаю събирахуться в Иеросалим, тъгда и Господь приде, всячьскы угажая Своим рабом и неистовьство противьных обличая июдей, поистине бо приде, ища заблужьших и спасть погыбъших. Многа бо по всей Палестине створи чюдеса, и не веровахуть Ему, нъ противу благодати  хулять, лестьца и блазнителя нарицающе Его.

Того ради при мнозе приде народе к Соломони водедьрьжи, иже нарицаеться Вифезда, сиречь Овьча купель, понеже ту полоскаху жьртвьных овець утробы. Над симь бе храм, пять притвор имея, и ту лежаше множьство болящих: хромых же и слепых и инеми недугы болящеи, чающе движениа воде, ангел бо Господень, приходя, възмущаше воду, и по возмущении первое вълезый цел бываше. Си же бе образ святаго крещения, понеже не всегда вода та ицеляше, нъ егда ю ангел възмутяше.

Ныня же к крещения купели Сам ангелскый Владыка Святый Дух приходя освящаеть ю, и даеть сдравие душам и телом, и грехом очищение; аще кто слеп есть разумомь, ли хром невериемь, ли сух мнозех безаконии отчаяниемь, ли раслаблен еретичьскымь учениемь - всех вода крещения зсдравы творить. Она купель многы приимающи, а единого ицеляше, и тоже не всегда, нъ единою лета; а крещения купель по вся дьни многы оживляющи створить к крещению, бо аще и всея земля придуть человеци, не умалиться Божия благодать, всем дающи ицеление от греховных недуг.

Рьцем же о Господни благодати, како приде к Овчи купели и виде человека раслаблена, долго время на одре в недузе лежаща, и въпроси его глаголя: "Хощеши ли сдрав быти?" - "Ей, - рече, - Господи! хотел бых, нъ не имею человека, дабы по възмущении ангелове въвергл мя бы в купель. Нъ аще мя еси о сдравии, Владыко, въпросил, то крътъце послушай моего ответа, да Ти своея болезни напасть исповеде. 30 и 8 лет на одре есмь недугомь пригвожден слежю; греси мои вся уды телесе моего раслабиша, а душа моя преже страсть поношении бодома бысть. Богови молюся, и не послушаеть мене, зане превзидоша безакония моя главу мою. Врачем издаях все мое имение и помощи улучити не възмогох, несть бо зелия, могуща Божию казнь пременити. Знаемии мои гнушаються мене, смрад бо мой всякоя утехы лиши мя, и ближьнии мои стыдяться мною, яко чюжь бых страсти ради братии моей. Вси человеци мною кльнуться, а утешающаго не обретох. Мьртва ли себе нареку? - Нъ чрево ми пища желаеть и язык от жажа исыхаеть. Жива ли себе помышлю? - Нъ не тъкмо въстати с одра, нъ ни подвигнути себе не могу: нозе имею непоступьне, руце же не тъчию безделне, нъ ни осязати себе тема съвладею. Непогребен мьртвьць разумеюся, и одр сь гроб ми есть. Мьртв есмь в живых и жив есмь в мьртвых, ибо яко жив питаюся и якоже мьртв не делаю. Мучим же есмь, акы в аде, бестудиемь поносящих ми; смех бо есмь унотам, укаряющимъся мною, и старцем же лежю притъча к наказанию. Мною вси глумяться, аз же сугубо стражю: утрьуду болезнь клещить мя, вънеуду досадами укоризньник стужаю си, от всех бо пльвание слин покрываеть мя. Двое сетование объдержить мя: глад паче недуга преодаляеть ми: аще бо и брашно обрящю, нъ в уста рукою въложити его не могу; всем молюся, дабы мя кто накърмил, и бываеть делим мой бедный укрух с питающими мя. Стоню с сльзами, томим болезнию недуга моего, и никтоже придеть посетит мене, един злостражю никымь же видим. Егда же останъци тряпез богобойных юдий принесени будуть сде, скоро притекуть приставници Овчая купели, и не тако пси Лазоревы облизаху струпы, якоже си моя помилования пожирають. Не имею же ни имения, да бых си единого умьздил о мне пекущася  человека, яко зле расточих даное ми в раи богатьство, и змьемь в Едеме украдена ми бысть чистоты одежа, и сде лежю наг Божия покрова. Не имам человека, иже бы не гнушаяся послужил ми: Енох и Илия не обретостася на земли, възята бо быста на колесници огньне и пребываета идеже Бог весть; Аврам с Иовомь, мало послуживша мне подобьным, преставистася в бесконьчную жизнь. Господи, человека не имам верна к Богу: Моиси боговидець и законодавець послеже съгреши к Богу и не въниде в землю обетованую; Соломон премудрый трикраты с Богом беседовав, на старость прирази к Богу и, женами прельстивъся, погыбе. Господи, человека не имам, въложаща мя в купель, вси бо уклонишася и неключими быша, и несть творящаго блага, несть единого, и не разумеют вси творящий безаконие".

И си вся от уст раслабленаго слышав, благый нашь врачь Господь Исус Христос отвещав к раслабленому:  "Что глаголеши: Человека не имам! Аз тебе ради человек бых щедр и милостив, не сългав обета Моего въчеловечения. Слышал бо еси пророка глаголюща, яко отроча родиться, Сын Вышняго, и дан бысть нам, и Тъ болезни и недугы наша понесеть. Тебе ради Горьняго Цесарьства скипетры оставль, нижьним служа объхожю, не придох бо, да Ми послужать, нъ да послужю. Тебе ради, бесплътьн сы, плътию обложихъся, да всех душевныя и телесныя недугы ицелю. Тебе ради, невидим сы ангельскым силам, всем человеком явихъся, не хощю бо Моего образа в тлении презрети лежаща, нъ хощю и спасти и в разум истиньный привести. И глаголеши: Человека не имам! Аз бых человек, да Богом человека сътворю, рех бо: Бози будуть и сынове Вышняго вси. И кто ин Мене верней служай тобе? Тобе всю тварь на работу створих, небо и земля тобе служита: оно влагою, а си плодомь.  Тебе ради солнце светомь и теплотою служить, и луна с звездами нощь обеляеть. Тебе деля облаци дъждьмь землю напаяють и земля всяку траву семениту и древа плодовитая на твою служьбу въздращаеть. Тебе ради рекы носять и пустыни звери питаеть. И глаголеши: Человека не имам! И кто есть Мене верней человек, яко не сългах обета въчеловечения Моего, кляхъся Аврамови глаголя: О семени твоемь благословяться языци, в Исаце же будеть ти племя, и в томь въплътивъся, отложю обрезание, створю же брежю воду, многа чада поражающю крещениемь, о нейже глаголеть Исаия, яко протържеся вода в пустыни; жажюще, на воду живу идете! Аз есмь животьное озеро, и се породьный источник от уст Моих на тя изливаю; а ты Овчая купели жадаеши, помале пресъхнути хотяща! Въстани, възми одр свой, да слышить мя Адам и обновиться  ныня с тобою от истьления, в тобе бо пьрваго преступления Евъжину клятву исцеляю, Лазоря, уже раскысевъша в гробе и четыри дни имуща в мьртвых, словомь жива створих, и тобе ныня глаголю: Въстани и възми одр свой и иди в дом свой!"

И скоро въскочи раслабленый с одра, съдрав всеми уды телесе и силою мощьн, и взем носивъшаго и одра, посреде народа хожаше. Бе же в тъ день субота, и видевъше его жидове, не порадовашася о съдравии немощьнаго, ни въздаша хвалы Богови, въздвигнувъшоому раслабленаго от одра немощи, ни реша: Како ти ся, брате, жилы укрепиша и телесныя уди утвьрдиша? Нъ акы зверие на оружьника нападъше, отбегоша и богохульная словеса, акы стрелы к камени пущающе съламахуся, изволиша бо неправду паче нежели глаголати правьду. И начаша претити носящему одр: "Субота есть и  недостоить ти взяти одра. Почто въстал еси от немощи? Почто ицелел еси от недуга? Почто пременилъся еси от болезни? Не лепо ти бе ныне одра своего носити!"

И рече им ицелевый от недуга: "Что се глаголете, о фарисеи! Мудри суще злобою обуродесте! Не насытисте ли ся 30 и 8 лет, зряще мене на одре исполумьртва лежаща? Ныне же, въставъшю ми Божиемь словомь, осльпосте умомь и о своей храмлюще претыкаетеся неправде. Аще не бысть добро, а зло не есть мое въстание! Аще не радуетеся преславному чюдеси, поне не завидите даному мне съдравию  и въстанию! Не будете, яко мъск конь, имъже несть разума! Господь поможеть мне на одре болезни моея и весь недуг мой обратил есть в съдравие. Рцете же ми, старци и судие Израилевы, в чьей вас клети украдено бысть даное мне  съдравие, да тако жаляще си претите ми? Никтоже вас преобиден, никогоже вас уем мне дарова, нъ иже  мя есть створил цела, Тъ мне рече: Въстани, възми одр свой и ходи! - И се есмь весь сдрав!"

Отвещаша книжьници: "Кто есть Он, Иже тя створи цела?" Носяй же одр не ведаше, Исусу уклоньшюся от народа, обаче глаголаше: "Несть вълхв, ни чародей, ни есть ходатай, ни ангел, нъ Сам Господь Бог Израилев, понеже не осяза мене рукама, ни приложи былия к вредом удов моих, нъ слово Его деломь бысть, рече бо ми: Въстани и ходи! И въследова слову дело и сдравие телеси. Темже не судите на лица, ни хулите Божия благодати, нъ праведный суд судите, рцете Богу, яко възвеличишася дела Твоя в Израили! И Господнемь чюдесьмь суботу почьстите, и Бога прославите, праздьник украсите!"

Нъ жидове не умълъкняху глаголюще: "Кто есть ицеливый тя в суботу? Покажи повелевъшаго ти носити одр в праздьник!" Обрете же его пакы Исус в церкви и глагола ему: "Се цел еси, ктому не съгрешай, да не горе ти что будеть!" Нъ  да не мним, яко тому единому се глагола Христос, нъ всем нам, приемъшим крещения благодать, имьже праотечьскыя очистихомься сквьрны и ицелени быхом от растьлевающаго ны греха. Нъ яко се бы рекл к ицелевъшему тому Господь: "Се в тобе всего Адама мозоли исцелих и падъша преступлениемь възведох, и всеродьную того клятву ныня отъях, отмых сквьрну всякого прегрешения крещениемь, възискав обретох шьдъшаго в пути неблагы кумирослужения, обязах раны уязвьнаго бесовьскыми разбойникы, възльях на язвы его Моея кръве вино и масло, и възьм на тела Моего скот, вънесох в гостиньницю - святую Церковь, дах два сребрьника гостиньнику - новый и ветъхый закон святителем, да прилежать учениемь людем, обещах и мьзду по възвращении Моемь спасъшим грешьникы  Се цел еси и ктому не съгрешай, горе бо, рече, в разуме съгрешающому!"

Разумейте же вси слова силу, яко по крещении не велить нам Господь съгрешати, да не пакы истьлим обновленаго Богом человека; по въсприятии же всякого священаго сана горе съгрешающому, реку же, по мнишьствс и по иерействе, и в самомь епискупьстве не боящимъся Бога. А человек тъ верьн бе, ибо по исцелении не въдасть себе в телесныя сквьрны, ни похули же Исуса пред июдеи, нъ в церкви пребываше, идеже и обрете его Христос. И тъ познав ицеливъшаго и глагола: "Праведьн еси, Господи, и слово Твое истина! Отныня причастьник есмь всем боящимъся Тебе и хранящим заповеди Твоя!" И иде по всей стране поведая, яко "Исус есть, иже мя створи цела".

Да и мы, братие, Исуса Христа, Бога нашего, прославим, ицеливъшаго нас от недуг греховьных, и к Нему верою припадем, глаголюще: Не помяни пьрвых безаконий наших и нынешьняя очисти съгрешения! Ты бо еси всех Бог, небесных и земных, человечьскый зижителю, ангельскый Творче, Цесарю мира всего, архангельскый владыко, херовимьскый сдетелю, серафимьскый украсителю! помилуй нас, на Тя уповающих, да спасени Тобою, славим Тя с Отцемь и с Пресвятымь Духомь и ныня и присно и в веки.

Слово свт. Кирилла Туровского из Соборника XIII в. Росс. нац. библ. F.n.I.39. Л.16-23.