По обычных приходных поклонах, еже есть: Боже милостив, и прочая

Предстоятель глаголет: За молитв святых отец наших, Господи Исусе Христе, Сыне Божии, помилуй нас

Мы же поем: Аминь

Ирмос, глас первыи: Христос раждается, славите. Христос с небесе, срящите. Христос на земли, возноситеся. Пойте Господеви вся земля, и веселием воспойте людие, яко прославися.

Ин ирмос, глас той же. Первовечному от Отца рождену нетленно Сыну, и в последняя от Девы воплощену без семене, Христу Богу возопием, воздвигнувыи рог наш, свят еси Господи.

Тропарь, глас четвертыи: Рожество Твое Христе Боже наш, возсия мирови свет разумныи. В нем бо иже звездам служащии, звездою поучахуся, Тебе кланятися Солнцу праведному, и Тебе ведети свыше Восток, Господи слава Тебе.

Слава Отцу и Сыну и Святому Духу.

Стихера, глас пятыи: Волсви персидстии царие, познавшее яве, иже на земли рождьшагося Царя Небеснаго. От светлыя звезды водими, достигоша в Вифлеем, дары носяще избранныя, злато и ливан и смирну. И падше поклонишася, видеша бо в вертепе Младенца лежаща безлетнаго

И ныне и присно и во веки веком, аминь

Кондак, глас третии: Девая днесь Пресущественнаго раждает, и земля вертеп Неприкосновенному приносит. Ангели с пастырми славословят. Волсви же со звездою путь шествуют. Нас бо ради родися Отроча младо Превечныи Бог.

Припев: Величай душе моя, иже в вертепе рождьшагося Царя Христа

Песнь девятая, ирмос, глас первыи: Таинство странно вижу, и преславно: небо сущу пещеру, Престол Херувимскии Девицу, ясли, вместилище, в них же возлеже невместимыи Христос Бог. Его же хваляще величаем.

Другии припев: Величай душе моя, Честнейшую небесных воинств. Деву пречистую Богородицу.

Ин ирмос: Подобаше убо нам, яко без беды страхом, удобь молчати. Любовию же Дево, песнь сложити, силою обостренною: дело есть драго. Но О! Мати, силу елико же бысть изволение даждь. И поклон до земли.

Слава Отцу и Сыну и Святому Духу, поклон. И ныне и присно и во веки веком, аминь, поклон. Господи помилуй, Господи помилуй, Господи благослови, поклон.

Отпуст: Рождеися в Вифлееме июдейстем, и в яслех возлегии, Господи Исусе Христе Сыне Божии, молитв ради Пречистыя Ти Матере, и всех святых, помилуй и спаси нас, яко Благ и Человеколюбец.

Аминь.

Величание: Величаем Тя Живодавче Христе. Нас бо ради ныне плотию рождьшагося от Безневестныя и Пречистыя Девы Марии.

Господи помилуй, трижды.

Отходные поклоны.  

Печатается по изданию: Христос раждается, славите! - Самара: Самарская Поморская община, 2006