Книжница Самарского староверия Понедельник, 2017-Дек-18, 08:07
Приветствую Вас Гость | RSS
Меню сайта

Категории каталога
Аудиофайлы [9]
Церковно-славянские шрифты [2]
Евангелие [2]
Апостол [3]
Богослужебные уставы [7]
Большой Потребник [1]
Большой Соборник [1]
Богородичны воскресны на 8 гласов [1]
Благословлю Господа на всяко время [1]
Ежедневные молитвы [1]
Златоуст [1]
Каноны [33]
Как правильно молиться епитимью [1]
Клиросник [1]
Лицевой Апокалипсис с толкованием [1]
Минеи [10]
Молитвы искусные [1]
Октай [6]
Певческие книги [4]
Правильные каноны [0]
См. Каноны
Причащение святыя воды [1]
Пролог [1]
Псалтырь [1]
Символ веры на осмь гласов [1]
Скитское покаяние [1]
Славление Христа [2]
Слово на Святую Пасху [2]
Cлово о погребении Господа [1]
Службы святым, не вошедшие в старопечатные Минеи [0]
Сборник для чтения 1651 г. [1]
Триодь постная [1]
Триодь цветная [3]
Херувимская песнь киевского роспева (крюковая запись) [1]
Часослов [2]
Чин како подобает самому себе причастити пречистых и животворящих таин Христовых [1]
Чины для мирян [6]

Главная » Книжница » Богослужение » Каноны

Канон святителю и исповеднику Амвросию Белокриницкому
[ ] 2007-Ноя-18, 17:57

Память его 30 октября (12 ноября)

 

Тропарь, глас 4. Святителю Амвросие, православию наставниче, вселенней светильниче, слово истины исправляя, за веру пострадал еси, ныне же радуяся со ангельстими лики, предстоя Святей Троице, моли Милостиваго Бога спастися душам нашим. 2ж. Слава, и ныне.

Богородичен гласу. Иже от века утаенное и ангелом не сведомое таинство, Тобою, Богородице, земным явися Бог в неразмесне снятии вопощаем. И Крест волею нас ради восприем, им же воскреси первозданнаго и спасе от смерти душа наша.

 

Канон святому Амвросию Белокриницкому. Глас 6, имыи краегранесие: Святаго Амвросия почтем вси.

 

 

Песнь 1. Ирмос. Яко по суху ходив Израиль, по бездне стопами, гонителя фараона видя потопляема, Богу победную песнь поя, вопияше.

Запев с поклоном: Святителю Христов и исповедниче Амвросие, моли Бога о нас.

Светлую память Твоего служителя и исповедника Амвросия како воспою грешныи аз, но Ты, Господи Боже мой, настави мя, мудрость ми даруй и силу, да возмогу достойно похвалити угодника Твоего.

Запев. Веселится земля и радуется о тебе небо, ты бо изрядныи глаголом и закону Божию послушник был еси, еретики посрамил еси, сердце свое Богови пожерл еси, святителю преславне и всечестне Амвросие.

Слава. Явися истинныи пастырь словесным овцам Христовым и неложныи служитель Божий, благочестию учитель и чистоте, сего ради тя вси любовию почитаем, ты же, престолу Божию предстоя, усердно молися о иже верою светло память твою славящих.

И ныне. Из Тебе, Чистая, пройде неизреченно Божие Слово Собезначальное Отцу и Духови в последняя времена. И перваго человека в тлю падшаго Тобою понови. Сего ради Тя присно славим.

Катавасия. Избави от бед рабы своя, святителю Христов и исповедниче Амвросие, яко вси по Бозе к тебе прибегаем, ты бо молиши о нас Христа, Бога нашего. Господи помилуй, 3ж.

Песнь 3. Ирмос. Несть свята, яко же Ты, Господи Боже мой, вознесыи рог верных си, Блаже, и утверждь их на камени исповедания Ти.

Запев. Твердо прилежа Вседержителеви, притече своим изволением, к животному источнику, Церкви Святей, яко елень. Просвещения исполнь быв, прием божественную благодать и явился еси Православию необоримое утвержение.

Запев. Агнец кроток и пастырь чюден явися, Агнцу вземлющему миру грехи и Пастырю всех тепле последуя. Слово бо Христово паче всех почел еси, премудре Амвросие, архиереом богодухновенное удобрение.

Слава. Гордаго змия, злобы обретателя умертвил еси и показал еси духовную крепость, последуя Христови в чертог небесныи вселися. Темже и со ангелы радуется, преблаженне, дух твой.

И ныне. Херувим и серафим превышши явилася еси, Богородице. Ты бо едина прият во чреве Своем Невиестимаго Бога. Тем же вси вернии песньми Тя, Чистая, ублажаем.

Катавасия.

Седален, глас 4. Крест Господень взем, Христови до конца от души последова, вспять не обернулся еси, но верных сердца просветил еси, и сего ради вечное наслаждение и пищу присноживущую восприял еси, богомудре архиерею Амвросие, ныне моли Христа Бога, грехов оставление подати, чтущим любовию святую память твою.

Слава и ныне. Богородичен, глас 4. Стена непобедимая нам християном еси, Богородице Дево, к Тебе бо прибегающии, невреждени пребываем. И паки согрешающе, имамы Тя Молитвенницу. Тем благодаряще вопием Ти: радуися, Обрадованная, Господь с Тобою.

Песнь 4. Ирмос. Христос мне сила, Бог и Господь, честная Церкви боголепно зовет вопиющи от совести чисты о Господе празднующи.

Запев. От Бога зван быв, достохвальне, Богови предстоиши боголепно украшен исповедничестими подвиги, нетленнаго сподобися безсмертия, ныне же в горних селениих веселуеши вопия: слава силе Твоей, Господи.

Запев. Адамант крепок, недвижим и непреклонен бысть во исповедании своем, венец благосилия и терпения прият нетленныи от Христа Бога нашего,  Ему же взываеши: слава силе Твоей, Господи.

Слава. Мудре и блаженне Амвросие, не забуди стадо свое, еже упасе благочестно, но  потщися привлещи ны во Иеросалим небесныи, идеже ныне радуяся зовеши: слава силе Твоей Господи.

И ныне. Тя пристанище спасения, чистоте жилище, селение Владыце всех и стену необориму, Владычице Богородице, свемы. Ты бо мольбами Си от бед избавляеши душа наша.

Катавасия.

Песнь 5. Ирмос. Божиим светом Ти, Блаже, утренюющих Ти душа любовию просвети, молюся, Тя ведети, Слово Божие, Истиннаго Бога, от мрака греховнаго изъимающа.

Запев. Вдовицам, и сирым, и обидимым бе отец, ныне же тя ко Спасу предлагаем вернии ходатая, и предстателя, и теплейша молитвенника, отче Амвросие.

Запев. Разорити крепость твоего исповедания тщася злыи враг, но посрамися, сего ради стадо твое вопиет ти, блаженне, молися ко Господу утвердити и умножити Церковь Свою.

Слава. От противящихся деснице Твоей, сохрани Господи Церковь Свою и молитвами святаго Амвросия укрепи и умири ю, и ересей востания скоро разори.

И ныне. Скверны всякия отъими, Дево Нескверная, души моея, вопию Ти. И спаси мя, Чистая, яже Истиннаго Бога Спаса на земли воплощьшая.

Катавасия.

Песнь 6. Ирмос. Житейскаго моря воздвизаема зря напастей бурею, в тихо пристанище притек, вопию Ти: возведи от тли живот мой, Многомилостиве.

Запев. Сербстему народу заступник бысть усердныи, святе Амвросие, от безбожных агарян, кровь неповинных тщащихся пролияти, ныне же от сих злочестивых и беззаконых державу нашу сохрани, священными ко Христу ходатайствы.

Запев. Иноверныя и вражия изнеможаху о тебе, богомудре, коварствия, ты же беззаконующих незатворимая уста явствено заграждаше, на Господа уповая, яко праведныи Иов вопия: буди имя Господне благословено во веки.

Слава. Яко прах вменил еси злато и почести, не восхоте славы сея маловременныя, но надежею и любовию ко Господу украшаемь, правду Божию возлюбил еси, Амвросие, святителем украшение.

И ныне. Препетая Дево, препетаго Бога порождьшая, поющия  Тя причастники покажи света божественнаго и избави огня геены и всякаго вражия лукавствия молитвами Си.

Катавасия, слава и ныне.

Кондак, глас 2. Господним желанием распалився, божественнаго света незаходимое светило явися, воссия яко звезда на тверди церковней, солнце Христа возвещающи, созывая всех торжествовати верою, тем же зовем ти, святителю Амвросие, со ангелы предстоя, моли непрестанно Христа Бога о всех нас.

Икос. Приидите, правовернии, сего великаго воспоем, яко святителя Христова и исповедника Амвросия, в песнех и пениих взывающе сице: радуися, Амвросие богомудре и богоблаженне. Радуися, всем верным похвало. Радуися, християном украшение и лепота. Радуися, Церкви столпе и стено. Радуися, притекающим к тебе, спасению ходатай. Радуися, яко имаши дерзновение молити непрестанно Христа Бога о всех нас.

Песнь 7. Ирмос. Хладодателну убо пещь сотвори ангел преподобным детем, халдея же опали велением Божиим, мучителя увеща вопити: благословен Бог отец наших.

Запев. Приидоста к тебе инока Павел и Алимпий и обретоста тя чюден кладезь священства, чист источник святительства неизчерпаем. И всему миру тя проповедоста, ты же, блаженне, напоил еси животочную водою истаявшия жаждею концы вселенней.

Запев. Очистил еси душу свою от ереси новолюбныя, к Церкви Святей прилепился еси, врагом Божиим мужествуя рече: аз сию веру единожды приях и вспять возвращатися не хощу.

Слава. Чист бе источник священства Христова, Амвросие всечестне, реку благодати всем источил еси, пищи воистину поток, от него же вси почерпающе, по долгу чтем тя, Церкви заступниче и Православию исповедниче.

И ныне. Всеблагая Владычице Богородице, яже Преблагаго Бога плотию рождьши, озлобленное страстьми сердце мое очисти, яко Тя едину Предстательницу вем, да верою и любовию Тя величаю.

Катавасия.

Песнь 8. Ирмос. Из пламене святым росу источи, а праведнаго жертву и воду попали, вся бо твориши, Христе, елико хощеши, тем Тя превозносим Господа во веки.

Запев. Таинник Божия благодати, сыи, блаженне, архиерей же верен, Православию наставник и истине согласник, ныне престолу предстоиши Владычнему, тем же чтем тя, Христа превозносяще во веки.

Запев. Егда на тя, незлобливаго агнца, злобою живущии яко дивии звери восташа, завистию поощряеми, ты же ревностию божественною мужествовав, за Христа пострада, Его же превозносим во веки.

Слава. Молитвенным си оружием далече отжени разсвирепеющия волки на стадо твое, мудре Амвросие, шатания ересей во смирение покори и всех пети научи: Господа пойте и привозносите Его во веки.

И ныне. Облак славы Ты еси, Препетая, и свеща солнечная, колесница многоценная, девическое возвышение, гора тучная и усыренная пребываеши, Пречистая Дево Господоименитая.

Катавасия.

Песнь 9. Ирмос. Бога человеком неудобь видети, нань же не смеют чини ангельстии зрети, Тобою бо, Пречистая, явися нам Слово воплощенно; Его же величающе с небесными вои Тя величаем.

Запев с поклоном. Вси роди християнстии днесь сошедшеся верою поют память мудраго Амвросия, Бог бо искуси его, и обрете достойна Себе, яко злато в горниле седмерицею искуси его, и яко всеплодну жертву прият.

Запев. Святыи Амвросие, благодатию божественнаго Духа истинен пастырь показася, стадо церковное добре упасл еси и на пажить спасеную возвел еси, ныне же священнолепно Богови предстоиши со ангелы ликовствуя.

Слава. Испроси душам християнстим велию милость, благолепие и мир Церкви Святей, дерзновение имея ко Господу и престолу Божию предстоя, тем молим тя, блаженне, молися Христу Богу спастися душам нашим.

И ныне. Светом Твоим мя, Богорадованная в женах Дево, просвети, молютися и огня вечнаго геенскаго избави, яко да величаю Тя, яко по долгу пою величие Твое.

Катавасия.

 

Отпуст. Господи Исусе Христе Сыне Божий, молитв ради Пречистыя Твоея Матере и иже во святых отца нашего Амвросия, митрополита Белокриницкаго, исповедника, и всех ради святых помилуй и спаси нас, яко Благ и Человеколюбец. Аминь.

 

Стихера евангельская, глас 2. Наследниче Божий, слуго Господень, пастырю добрыи, начальнаго Пастыря Христа учениче, положивыи душу по овцах, сам ныне, святе Амвросие, дерзновение имея ко Господу, мир мирови испроси и душам нашим велию милость.

 

Канон написан Д.Урушевым

Категория: Каноны | Добавил: samstar-biblio
Просмотров: 1244 | Загрузок: 0

Форма входа

Поиск

Старообрядческие согласия

Статистика

Copyright MyCorp © 2017Бесплатный хостинг uCoz