Книжница Самарского староверия Среда, 2017-Авг-23, 16:48
Приветствую Вас Гость | RSS
Меню сайта

Категории каталога
Свт. Амфилохий. епископ Иконийский [1]
Прп. Антоний Великий [1]
Прп.Авва Дорофей [1]
Свт. Василий Великий [4]
Свт. Григорий Антиохийский [1]
Свт. Григорий Палама [1]
Свт. Григорий Богослов [2]
Свт.Григорий Нисский [1]
Свт.Геннадий, патриарх Царя-града [4]
Прп. Ефрем Сирин [6]
Свт. Иоанн Златоуст [20]
Прп. Исаак Сирин [3]
Прп. Иоанн Лествичник [1]
Свт. Кирил Туровской [2]
Свт.Лев Великий [1]
Прп. Петр Дамаскин [2]
Блж. Симеон Солунский [1]
Прп. Симеон Новый Богослов [3]
Прп. Феодор Студит [7]

Главная » Статьи » Святоотечеcкие поучения » Свт. Григорий Антиохийский

Во Святую Великую субботу поучение

Что се безмолвие на земли; и что се молчание много; яко Царь спит. Земля убояся, и умолче, яко Бог успе плотию. Бог плотию умре, и ад вострепета. Бог в мале успе, и от века спящыя от Адама возстави. Где вчерашния молвы многи на Христа беззаконных; где народ мног; где дреколия, иереи же и судии злыя; где свещи и мечи, и говори безчисленнии, и людей шатания;  воистинну убо людие поучишася тщетным, поткошася о твердый камень, и сотрени быша.

Вознесоша Господа на древо, и сошед умертви я. Сказаша солнца Христа, но разреши вечныя узы, и освети темныя, и диавола победи. Зайде бо солнце под землю, и тму мрачную жидом сотвори, и обретеся им малая та радость, на неизбытную тугу  и лютую  печаль. Днесь спасение на земли сущым, и от века под землею держимым. Двое человеколюбие Божие, вкупе же и смирение: под землю яко человек сходит и погребен бысть, но яко Бог мертвыя от ада и возводит.

Вчера судим, и за ланиту ударение прият и связан: днесь же связа диавола нерешимыми узами, и осужденный свободи. Вчера слуги пилатовы поругашася Ему, а днесь вратницы адовы видевше Его исчезоша, и смерть попрася, и адова сила погибе.

Вчера, егда Господь на кресте бе, вся тварь рыдаше: солнце в полудни помрачи свет свой, и земля потрясеся, и камение распадеся на обличение жидом, и красота церковная раздрася, и многа телеса усопших святых восташа: и от шестаго часа до девятаго тма бысть по всей земли, и по девятом часе Исус испусти дух.

Нощию Христос родися в Вифлееме, и нощию же паки из мертвых востает. Пелены в рожестве прият, тако и в погребении повися. Ангел Марии рожество Его поведа, ангел же паки и воскресение Его благовествует. В рожестве Его Иосиф обручник бе, а зде Иосиф иже от Аримафея. И якоже родися, в рожестве девства печати целы соблюде, тако и воскрес не руши гроба печатей.

Позде же бывшу рече, бе бо зашло во ад праведное солнце, прииде человек богат именем Иосиф от Аримафея. Воистину богат, ибо прият тело Господне, безценнаго бисера, Творца всей твари. Прииде же и Никодим, пришедыи ко Исусови нощию. Два потаеная ученика, Иосиф и Никодим, скрыти приидоста вогробе во плоти Бога, друг друга преспевая в любви Божий. Никодим же змирну и аллой купи телу Христову, а Иосиф о дерзновении к Пилату похвален. Вшед бо без страха премудро начат просити тела Исусова, не велики прилагая речи, да не в гнев введет судию, и прошения не улучит. Но вшед глагола, о! Пилате, мало прося приидох к тебе: даждь ми тело мертвое на погребение, от тебе осужденнаго Исуса Назарянина, на древе висяща, и всеми небрегома. Кая бо вам полза от тела страннаго сего; даждь ми тело волею страннаго, иже не имать где главы подклонити. Даждь ми страннаго, иже не име града, ни веси, ни храма, ни обители, ни рода, ни другое, ни пособник, но токмо едину матерь. О мертвем молю тя, иже от ученика продан, и от братии изгнан, и от своих раб заушен, и от ученик оставлен, и от своея матере отлучен, и от приимших от него пищу, оцта и желчи напоен, и от исцелевших от него язву прият. Молю тя, о! Пилате, о висящем на кресте: несть бо сему отца на земли, ни друга, ни ужика, ни ученика, ни погребающаго: но уединен есть, и един аки убогий, создавый вся. Даждь ми, о! Пилате, мертвое тело в погребение. Сим словесем от Иосифа к Пилату реченным, повеле Пилат дати тело Исусово. Иосиф же и Никодим, снемши со креста и погребоши и.

Наутрие же в суботу собрашася архиереи и фарисеи к Пилату глаголюще: помянухом, яко льстец он жив сыи глагола, по триех днех востану: повели убо утвердити гроб до третияго дне, да не како ученики Его пришедше нощию украдут, и рекут людем, воста от мертвых, и будет последняя лесть горша первых. Пилат же рече им: аще противника закону и лестца глаголете, то почто боитеся Его; ибо уже умре и погребен бысть. Имате стражи и воины, якоже хощете блюдите Его, железы гроб Его обложите, или печатайте, да последи не речете, аще не бы Пилат возбранил нам, не быхом погубили мертвеца. Якоже весте утвердите гроб. И аще кто от ученик Его приидет, убийте его.

Они же шедше железы утвердиша гроб, и многи стражи устроиша, небрежаху суботы злое творяще, мняще беззаконии удержати Творца и Бога всех. О! законопреступницы злии, почто Господа лестцем нарицаете, иже многих свободи от духов нечистых. О! Окаяннии лестцы, той вас прекорми четыредесят лет в пустыни, и манну вам дарова, и воду из камене источи. Льстец ли бе, иже пятию хлебы пять тысящ людей насыти, и многа вам яви чудеса: слепыя просвети, прокаженныя очисти, Лазаря четверодневнаго возстави от гроба; О! проклятии, аще льстец есть Господь, то почто боитеся глагол Его;

И бысть в ту нощь стрегущим воином гроб, и сон тяжек обьят я: ангел же  Господень сшед с небесе и убуди стражи, и камень отвали от гроба, и седе на нем ругаяся железным печатем, и рече им: О! стражие, где есть стрегомый вами; воста убо якоже глагола жив сыи: зрите же, кто Его украдает; ваши бо иереи лестцем Его нарекоша. Добре о вас пророк провозгласи:  ужаснися  небо, и убойся   земле,   яко   в   толико   неверие прииде род жидовский. Се рек ангел невидим бысть.

Да и мы вернии блюдемся в неверие впасти, и оставим вся злая дела, зависть, гнев, клевету, татьбу, и вся прочая неправды, да сподобит ны Христос Бог радости воскресения Своего. Ему же слава ныне и присно и веки веком. Аминь.

Категория: Свт. Григорий Антиохийский | Добавил: samstar-biblio (2007-Ноя-25)
Просмотров: 716

Форма входа

Поиск

Старообрядческие согласия

Статистика

Copyright MyCorp © 2017Бесплатный хостинг uCoz